السلام عليكم ورحمه الله وبركاته
اللهم صل وسلم علي سيدنا محمدا وعلي آله وصحبه وسلم تسليما كثيرا
النهارده البسبوسه طيب ايه الجديد في مية طريقة بسبوسه طيب معلش بشويش علي كده وجربوا الطريقه ده بالمره بجمله الفشل لو فشلت ولو نجحت وده انا واثقه فيه يبقي انت يا فتوكه اللي كسبت طريقه بسبوسه ولا العبد بقالي سنين بعملها بس قولت لازم ولابد انزل لاحلي فتوكات يجربوا بسبوستي يمكن حد يدعيلي دعوه حلوه في كام سر من اسرار نجاح البسبوسه حنقولهم مع بعض
المقادير
نص كيلو دقيق سميد ( من عند العطار ) 2.5 كوب سميد
يعني لا حلو الشام ولا حلو الصمدي ولا غيره السايب اللي عند العطار
كوب الا ربع سكر
نص كوب سمنه بلدي افضل شئ او زبده ممكن او 3ملاعق مليانه
خمسين جرام عسل تقيل حوالي ثلث الكوب ( الشربات اللي بنسقي بيه الحلويات بس ده حنسيبه يتقل علي النار شويه يبقي في سماكه العسل النحل كده )
نص كوب جوز هند او اقل او اكثر حسب ما بتحبيه
نص كوب لبن
نص معلقه بكنج بودر
الطريقه
نحط المقادير الجافه مع بعض والسائله مع بعض
ثم نضعهم علي بعض ونخلط علي خفيف
لحد ما بتقي عجينه تقيله تتفرد في الصينه بالمعلقه مش سايحه خالص ولا صلبه
اول سر لو متوفر طحينه ندهن الصنينه بالطحينه دهن خفاف بالاصابع مش نكتر ليه بقي علشان تطلع قطع البسبوسه متماسكه جدا وكل قطعه بقطعتها مش تتفتت ولا تلزق انا مكنش عندي المرده ده والحمد لله طلعت سليمه برضه بس بالطيحينه بتبقي احلي واحلي بالشكله ده 
ونحط المكسرات المتوفره او بدون
وبعدين ندخلها الفرن علي الشبكه اول ما تبدء تحمر من تحت نشغل الشوايه لو بيشتغلوا مع بعض لو لا نحمرها من تحت وبعدين نولع الشوايه لحد ما تحمر
في الوقت ده نعمل ايه العسل
العسل اللي يكفي نص كيلو
عباره عن
2.5 كوب سكر
2 كوب ميه
نص ليمونه
3 ملاعق عسل جلكوز لو متوفر
ويا سلام بقي لو شويه فانيليا وملعقه سمنه بلدي بعد ما العسل يستوي
بعد ما تغلي بخمس دقايق نطفي عليه لان عسل البسبوسه بيكون خفيف
وبعدين لما تستوي البسبوسه نكون لسه طافين علي العسل ونسقي البسبوسه
يعني السر التاني الشربات سخن بيغلي والبسبوسه مولعه من الفرن وتصبي عليها بالشكل ده
ايه اللي انا عمله ده كل ده شربات
ايوا ده متعمد يا فتوكات
وده سر جديد
لازم البسبوسه تبقي غرقانه عسل يعني العسل مغطيها ومغرقها
وتفضل كده ساعتين ولا حاجه لحد ما تشرب العسل ولوفي زياده تصفيه
وده بيخلي البسبوسه طريه وطعمها تحفه
المقدار اللي قولت عليه للعسل مش حيبقي فيه زياده ان شاء الله لاني عملت المقدار بالظبط وشربته وكان في زياده بسيطه اوي
وده بعد ساعه لما شربت كل الشربات بتعها وفي حاجات بسيطه في الجوانب 
وهنا بعد ما قطعتها وشكلها جميل ازاي
وهنا الصينيه بعد ما اخدنا منها البسبوسه بصوا القطع طالعه متماسكه ازاي
ايه رايكم
تحفه والله تستاهل المحاوله وجربوا وحتدعولي
اخيرا سيبها في المطبخ متغطيه مش حيجرلها حاجه خالص انا فضلت في المطبخ لحد ما خلصت لان التلاجه حتنشفها
بتوع الرجيم اللي انا منهم انا حاولت محاولت كتير علشان اقلل السكر فيها بصراحه كلها بتفشل والحمد لله ده افضل طريقه يعني اللي عامله رجيم تدوق بس زي حالاتي بس انا اصلا مش غاويه شرقي الحمد لله بعملها لولادي وجوزي وانا بدوقها بس
انسي واعمليها في يوم الفري ولومقدرتشي تقاوم وكلت منها كتير اوعي تدعي علي الله يكرمك
دعواتكم يا قمرات والتقيم طبعا والرد علشان الموضوع يترفع شويه كالعاده
منتديات نساء نت :: 
عملت بسبوسه وفشلت طيب معلش جربي دي باسرارها الجديده من مطبخي
บ้าน 
Wed Feb 27, 2013 8:59 pm
