السلام عليكم ورحمة الله وبركاته
سبحان الله وبحمده عدد خلقه ورضا نفسه ومداد كلمته وزنة عرشه
كل سنه وإنتم طيبين وبصحة وسعادة
إزيكم يا أحلى فتوكات وأحلى عضوات فى أحلى منتدى
دة بقى أول موضوع ليا فى قسم الحلويات يعنى عايزة تصفيق حاد مبدئيا
ومش بس كدة كمان أول مرة فى حياتى المعمليه الفذة أعمل بلح الشام وطلع واااااااااااو أحلى من بتاع المحلات مقرمش من برة وطرى ولذيذ من جوة يعنى عايزة تصفيق حاد كمان........ طبعا ما فيش حاجة بالساهل
ذاكرت الموضوع كويس بصراحةكان ناقص أعمل دبلومه وقلت أسجل اللحظة التاريخيه دى بالصورة
بس أهم حاجة إن يكون موجود قمع كبير من بتوع البتيفور لإن بصراحة المشكله كانت فيه وإضطريت أستلفه من جارتى العزيزة
المهم عشان ماتقتلش أخش فى الموضوع على طول
المكونات: دى المقادير اللى بيشتغل فيها الشيف حسن عشان نكون فى المضمون
* ربع لتر ميه حوالى مج كبير * مئة جرام زيت ما يعادل نصف مج زيت
* مئتين جرام دقيق ما يعادل مج ونصف مج دقيق عليه ذرة ملح * تلات بيضات كبار * كيسين فانيليا والكميه دى تكفى وتزيد أسرة مكونه من خمس أشخاص
ودى صورة بالمكونات الطريقه :
* فى حله تيفال أحط الميه عالزيت وأسخنهم عالنار 
* وعند الغليان أبعدهم عالنار وأحط الدقيق كله مرة واحدة وبعدين ألم الدقيق بالميه عالنار وأطفى على طول حتعمل عجينه وطبعا العجينه بتكون سخنه أستخدم العجانه وآخدها عالعجانه وأشغلها شويه ومن خلال إستخدام العجانه العجينه حتكون بردت شويه ولما اتأكدت إن درجة حرارة العجينه هديت خالص وإبتدى أنزل بالبيض واحدة واحدة يعنى واحدة وأشغل العجانه وبعدين لما العجينه تستوعبها أنزل بالتانيه وبعدين أحط الفانيليا مع آخر بيضه وللأسف نسيت أصور شكل العجينه فى الآخر بس أنا ماضفتش حاجة خالص بعد كدة زيادة عن المقادير اللى كنت مصوراها
بس هى عجينه طريه سهله التشكيل شبه عجينه البتيفور بس أطرى شويه ودلوقتى بقت العجينه فى درجة حرارة الغرفه
وبعدين ولعت على الزيت وطبعا الزيت بيكون غزير و النار بتكون واطيه خالص
و نزلت ببلح الشام وما استنتش إن الزيت يسخن وبما إن الزيت ماكانش سخن جامد فهبط بلح الشام فى القاع وبعدين انتفخ مع الحرارة وطفا على وش الزيت زى ما الصور بتقول
هنا البلح راقد فى القاع لإن الزيت مش سخن
والزيت هنا بيبتدى يسخن
هنا البلح بيبتدى يطلع لفوق لإن الزيت سخن جامد وكل دة والنار واطيه
وفضلت النار واطيه و ما حاولتش أقلبه خالص لحد أما إبتدى يتلون إبتديت أقلبه والنار واطيه برضه
ممكن فى الوقت دة أعلى النار شويه
ودة اللون اللى بحبه دهبى غامق عشان أضمن بيه القرمشه اللى أنا بحبها 
وبعدين حطيته عالعسل وبعدت الطاسه عالنار علشان الزيت يهدا إستعدادا للمقدار التالى غمرتها فى العسل واحدة واحدة وبعدين حطتها على مصفاه عشان أصفى العسل بالنسبه للطاسه اللى بعدها حبيت إن الزيت برضه ما يكونش سخن جامد زى بدايه المرة اللى فاتت والطاسه كانت بعيدة عن النار ابتديت أقطع العجينه وأرص فى الصينيه لحد ماإستوعبت المقدار بتاعى ورحت رداها مرة تانيه على النار وكررت الخطوات السابقه برضه والنار واطيه ودى الصورة النهائيه للطبق بتاعى 
ودى صورة كمان 
عايزة أعرف الآراء يا فتوكات
وكالعادة حازعل كتير جدا من الفتوكة الحلوة اللى تقرا الموضوع
وماتكتبليش رد عليه لإن الفتوكة لما بترد بتدى فرصه أكبر لأكبرعدد ممكن من الفتوكات إنهم ياخدوا بالهم من الموضوع ويستفيدوامنه
وكمان حازعل خالص لو ما قيمتوش الموضوع اللى باتمنى إنه يكون حاز إعجابكم
بحبكم كلكم فى الله
منتديات نساء نت :: 
بلح الشام مقرمش من برة وطرى ولذيذ من جوة من إيد ردينى وبالخطوات التفصيليه والصور كمان
บ้าน 
Wed Feb 27, 2013 8:59 pm
